प्रा. डॉ. विजय गाढे यांच्यावर महाराष्ट्र राज्य पत्रकार संघाच्या उत्तर महाराष्ट्राची जबाबदारी

अमळनेर (प्रतिनिधी) महाराष्ट्र राज्य पत्रकार संघ, मुंबईच्या उत्तर महाराष्ट्र उपाध्यक्षपदी प्रा. डॉ. विजय शालिग्राम गाढे यांची नियुक्ती करण्यात आली आहे. संघटनेच्या वरिष्ठ पदाधिकाऱ्यांच्या मान्यतेने राज्य संघटक किशोर रायसाकडा व उत्तर महाराष्ट्र अध्यक्ष भुवनेश विसपुते यांनी नियुक्तीपत्राद्वारे ही घोषणा केली.

खान्देश विभागात पत्रकारिता क्षेत्रासह महाराष्ट्र राज्य पत्रकार संघाच्या संघटनात्मक वाढीसाठी व विस्तारासाठी प्रा. डॉ. विजय शालिग्राम गाढे यांनी केलेल्या उल्लेखनीय कार्याची दखल घेत त्यांच्यावर ही महत्त्वाची जबाबदारी सोपविण्यात आली आहे. उत्तर महाराष्ट्रातील जळगाव, धुळे, नंदुरबार, नाशिक आणि अहिल्यानगर या पाच जिल्ह्यांमध्ये संघटनेचे कार्य अधिक प्रभावीपणे वाढविण्याची जबाबदारी त्यांच्यावर राहणार आहे. संघटनेची ध्येयधोरणे, उद्दिष्टे व नियमावलीचे पालन करून उत्तर महाराष्ट्रातील संघटनात्मक कार्य अधिक प्रभावीपणे वाढविणे, पत्रकार बांधवांना संघटनेच्या माध्यमातून एकत्रित करणे तसेच संघटनेचा विस्तार करण्यासाठी सक्रिय भूमिका बजावावी, असे नियुक्तीपत्रात नमूद करण्यात आले आहे. प्रा. डॉ. विजय शालिग्राम गाढे यांच्या अनुभवाचा, कार्यक्षमतेचा आणि संघटन कौशल्याचा संघटनेच्या भविष्यातील वाटचालीस निश्चितच लाभ होईल, असा विश्वास महाराष्ट्र राज्य पत्रकार संघाचे राज्य संघटक किशोर रायसाकडा यांनी व्यक्त केला आहे. राज्य समन्वयक संजय जी. भोकर, राज्य अध्यक्ष नितेश सोमाणी, राज्य सरचिटणीस डॉ. विश्वास आरोठे आणि राज्य संघटक किशोर रायसाकडा यांच्या मान्यतेने ही नियुक्ती करण्यात आल्याचे नियुक्तीपत्रात नमूद आहे. प्रा. डॉ. विजय शालिग्राम गाढे यांच्या नियुक्तीबद्दल पत्रकारिता व सामाजिक क्षेत्रातून अभिनंदन होत असून, त्यांच्या पुढील संघटनात्मक कार्यासाठी शुभेच्छा व्यक्त करण्यात येत आहेत. याप्रसंगी संघाचे खान्देश विभागीय अध्यक्ष डॉ. समाधान मैराळे, उपाध्यक्ष सुतार, तालुका अध्यक्ष सुरेश कांबळे, अमळनेर तालुका सचिव नूरखान आदी उपस्थित होते.