सु.आ.पाटील माध्यमिक विद्यालयात वृक्षदिंडीतून पर्यावरण संवर्धनाचा दिला संदेश

अमळनेर (प्रतिनिधी) पिंपळे बुद्रुक येथील कै. सु. आ. पाटील माध्यमिक विद्यालयात वृक्षदिंडी व गणवेश वाटपाचा कार्यक्रम उत्साहात आणि आनंदी वातावरणात झाला. विद्यार्थ्यांमध्ये पर्यावरण संवर्धनाची जाणीव निर्माण व्हावी, तसेच गरजू विद्यार्थ्यांना गणवेशाचा लाभ मिळावा, या उद्देशाने या कार्यक्रमाचे आयोजन करण्यात आले.

कार्यक्रमाच्या अध्यक्षस्थानी एस. यू. पाटील सर होते. प्रमुख पाहुणे म्हणून पिंपळे बुद्रुक गावचे उपसरपंच योगेश पाटील, पिंपळे खुर्द गावचे सामाजिक कार्यकर्ते युवराज पाटील, नवलनगर येथील महिला बचत गटाच्या अध्यक्षा मुक्ताबाई थोरात तसेच नवलनगर येथील दादासो बापू गुमनार उपस्थित होते. कार्यक्रमाचे विशेष आकर्षण म्हणजे योगेश पाटील आणि मुक्ताबाई थोरात यांनी सामाजिक बांधिलकी जपत आपल्या स्वखर्चातून शाळेतील विद्यार्थ्यांना गणवेश उपलब्ध करून दिले. त्यांच्या या सामाजिक योगदानाबद्दल शाळेच्या वतीने कौतुक करून आभार व्यक्त करण्यात आले. स्वखर्चातून मिळालेल्या गणवेशामुळे विद्यार्थ्यांच्या चेहऱ्यावर आनंद फुलला.

यावेळी विद्यार्थ्यांनी उत्स्फूर्तपणे वृक्षदिंडीत सहभाग घेत पर्यावरण संवर्धनाचा संदेश दिला. वृक्षांचे महत्त्व, वृक्षसंवर्धन आणि पर्यावरण रक्षणाबाबत जनजागृती करण्यात आली. विद्यार्थ्यांनी पर्यावरणपूरक संदेश देत परिसरात वृक्षसंवर्धनाची भावना जागृत केली. कार्यक्रमाला शाळेचे मुख्याध्यापक बी. आर. पाटील, ज्येष्ठ शिक्षक डी. बी. पाटील तसेच शाळेतील सर्व शिक्षक व शिक्षकेतर कर्मचारी उपस्थित होते.

कार्यक्रमाचे सूत्रसंचालन उपशिक्षक एम. पी. निकम यांनी केले. एच. एस. पवार यांनी प्रास्ताविकातून कार्यक्रमाचा उद्देश व महत्त्व स्पष्ट केले. गुमनार मॅडम यांनी प्रमुख पाहुण्यांचा परिचय करून दिला. कार्यक्रमाच्या शेवटी गोपाल पाटील यांनी उपस्थित मान्यवर, शिक्षक, शिक्षकेतर कर्मचारी आणि विद्यार्थ्यांचे आभार मानले. वृक्षदिंडीच्या माध्यमातून पर्यावरण संवर्धनाचा संदेश देतानाच सामाजिक बांधिलकी जपत विद्यार्थ्यांना स्वखर्चातून गणवेश देणाऱ्या योगेश पाटील आणि मुक्ताबाई थोरात यांच्या उपक्रमाचे उपस्थितांनी कौतुक केले. पर्यावरण संवर्धन आणि सामाजिक योगदान यांचा सुंदर संगम घडवून आणणारा हा कार्यक्रम उत्साहात झाला.