सफाई कर्मचाऱ्यांना नमस्ते कार्ड, आयुष्मान भारत कार्डसह पीपीई किटचे वाटप

अमळनेर (प्रतिनिधी) सेवा संकल्प अभियान व ‘स्वच्छता ही सेवा अभियान-२०२६’ अंतर्गत अमळनेर नगरपरिषदेच्या वतीने सफाई कर्मचाऱ्यांच्या आरोग्य व सुरक्षिततेच्या दृष्टीने विविध उपक्रम राबविण्यात येत आहेत. नगराध्यक्ष डॉ. परीक्षित बाविस्कर व मुख्याधिकारी गणेश शिंदे यांच्या मार्गदर्शनाखाली बुधवार, ३० सप्टेंबर रोजी नगरपरिषदेच्या आरोग्य विभागात सफाई कर्मचारी मित्रांसाठी आरोग्य सुरक्षा व कल्याणपर उपक्रमाचे आयोजन करण्यात आले.

या उपक्रमांतर्गत ‘सफाई मित्र सुरक्षा अभियान’ अंतर्गत सफाई कर्मचाऱ्यांना नमस्ते कार्ड, आयुष्मान भारत कार्ड तसेच पीपीई किटचे वाटप करण्यात आले. शहराच्या स्वच्छतेसाठी सफाई कर्मचारी सातत्याने कार्यरत असून, त्यांच्या आरोग्याची व सुरक्षिततेची काळजी घेणे ही नगरपरिषदेची महत्त्वाची जबाबदारी आहे. कर्मचाऱ्यांना आवश्यक आरोग्यविषयक सुविधा, सुरक्षा साहित्य तसेच शासकीय योजनांचा लाभ मिळवून देण्याच्या उद्देशाने हा उपक्रम राबविण्यात आला.

यावेळी सफाई कर्मचारी मित्रांच्या उल्लेखनीय योगदानाबद्दल प्रमाणपत्र देऊन त्यांचा गौरव करण्यात आला. उपस्थित सर्वांना स्वच्छता शपथ तसेच नशामुक्त भारत करण्याबाबत शपथ देण्यात आली. शहर स्वच्छ व सुंदर ठेवण्यासाठी प्रतिकूल परिस्थितीतही प्रामाणिकपणे सेवा बजावणाऱ्या स्वच्छता कर्मचाऱ्यांच्या कार्याचा सन्मान करण्याचा हा उपक्रम असल्याचे यावेळी सांगण्यात आले. ‘स्वच्छ शहर, निरोगी कर्मचारी आणि सुरक्षित स्वच्छता व्यवस्था’ या उद्देशाने अमळनेर नगरपरिषदेकडून स्वच्छता कर्मचाऱ्यांच्या आरोग्य, सुरक्षा व सामाजिक कल्याणासाठी विविध उपक्रम सातत्याने राबविण्यात येत आहेत. या माध्यमातून सफाई कर्मचाऱ्यांच्या कार्याचा गौरव करण्याबरोबरच त्यांना आरोग्य व सुरक्षिततेसाठी आवश्यक सुविधा उपलब्ध करून देण्याचा संदेश देण्यात आला.

कार्यक्रमास आरोग्य विभागाचे स्वच्छता निरीक्षक संतोष जाधव, संतोष माणिक, किरण कंडारे तसेच आरोग्य विभागातील अधिकारी-कर्मचारी, सफाई कर्मचारी व शिपाई मित्र उपस्थित होते.