सती माता मंदिर परिसरात माय भारत स्वयंसेवकांचा स्वच्छतेचा जागर; प्लास्टिकमुक्त अभियानातून जनजागृती

अमळनेर (प्रतिनिधी) सेवा संकल्प अभियान व सेवा पंधरवड्यानिमित्त सती माता मंदिर परिसरात माय भारत स्वयंसेवकांच्या माध्यमातून प्लास्टिकमुक्त स्वच्छता अभियान राबविण्यात आले. माय भारत अमळनेर तालुका स्वयंसेवक सागर कोळी यांच्या माध्यमातून आयोजित या अभियानात महाविद्यालयीन विद्यार्थ्यांनी उत्स्फूर्त सहभाग घेत परिसरातील प्लास्टिक व इतर कचरा संकलित करून मंदिर परिसराची स्वच्छता केली. यावेळी नागरिकांमध्ये स्वच्छता, पर्यावरण संवर्धन आणि प्लास्टिकचा वापर टाळण्याबाबत जनजागृती करण्यात आली.

मेरा युवा भारत, जळगावचे जिल्हा युवा अधिकारी अभिषेक चवरे यांच्या मार्गदर्शनाखाली तसेच समाजकार्य महाविद्यालयाचे प्राचार्य डॉ. पी. एस. पाटील, राष्ट्रीय सेवा योजना कार्यक्रमाधिकारी विजयकुमार वाघमारे आणि प्रा. अनिता खेडकर यांच्या मार्गदर्शनाने या स्वच्छता अभियानाचे आयोजन करण्यात आले. सेवा पंधरवड्यानिमित्त राबविण्यात आलेल्या या उपक्रमातून ‘स्वच्छ परिसर, सुंदर परिसर आणि प्लास्टिकमुक्त पर्यावरण’ असा संदेश देण्यात आला. विद्यार्थ्यांच्या श्रमदानातून सामाजिक बांधिलकी, पर्यावरण संवर्धन आणि स्वच्छतेचा संदेश समाजापर्यंत पोहोचविण्याचा प्रयत्न करण्यात आला. या स्वच्छता अभियानात तेजस्विनी, अनुजा, जान्हवी, रत्ना, कीर्ती, मयुरी, जान्हवी माळी, सुमित, क्रिश, धम्मदीप, कल्पेश, दीपक, सुशील आणि राजेंद्र या विद्यार्थ्यांनी सक्रिय सहभाग नोंदविला.