नगरपरिषदेची लिफ्ट अचानक बंद; कर्मचारी अडकला नागरिकांच्या सुरक्षेचा प्रश्न ऐरणीवर

अमळनेर (प्रतिनिधी) नगरपरिषद कार्यालयातील लिफ्ट मंगळवारी, दि. २९ सप्टेंबर रोजी सकाळी साडेअकरा ते बाराच्या दरम्यान अचानक बंद पडल्याने एक कर्मचारी लिफ्टमध्ये अडकला. अचानक लिफ्ट बंद पडल्याने काही काळ कर्मचाऱ्यांमध्ये भीतीचे वातावरण निर्माण झाले. लिफ्टमध्ये अडकलेल्या कर्मचाऱ्याने दरवाजा उघडण्याचा प्रयत्न केला. अखेर प्रयत्नांनंतर लिफ्टचा दरवाजा उघडण्यात आल्याने अडकलेल्या कर्मचाऱ्याची सुटका झाली.

नगरपरिषद कार्यालयात दररोज मोठ्या संख्येने नागरिकांची ये-जा असते. त्यातच लिफ्ट वारंवार बंद पडत असल्याने नागरिकांच्या सुरक्षेचा गंभीर प्रश्न निर्माण झाला आहे. विशेषतः ज्येष्ठ नागरिक, महिला किंवा अन्य नागरिक लिफ्टमध्ये अडकले असते आणि त्यावेळी आपत्कालीन परिस्थिती निर्माण झाली असती, तर त्याची जबाबदारी कोणाची? असा सवाल उपस्थित होत आहे.

वारंवार बिघाडाकडे दुर्लक्ष?

नगरपरिषद कार्यालयातील ही लिफ्ट यापूर्वीही अनेकदा बंद पडल्याच्या तक्रारी असून, ती नादुरुस्त अवस्थेत असल्याचे सांगितले जात आहे. वारंवार लिफ्ट बंद पडत असतानाही संबंधित प्रशासनाकडून तिच्या दुरुस्तीबाबत गांभीर्याने कार्यवाही होत नसल्याने नागरिकांमध्ये नाराजी व्यक्त होत आहे. लिफ्टची तातडीने तांत्रिक तपासणी करून आवश्यक दुरुस्ती करावी तसेच नागरिकांच्या सुरक्षेच्या दृष्टीने लिफ्ट सुरक्षित असल्याची खात्री करावी, अशी मागणी नागरिकांकडून होत आहे.