ऑगस्ट ठरला अमळनेर तालुक्यासाठी काळा महिना; अपघात, बुडणे अन् आत्महत्यांच्या मालिकेने अनेक संसार उद्ध्वस्त

देवाचा भंडारा खाऊन परतताना काळाचा घाला, कुठे नदी-धरणाच्या पाण्यात मृत्यू; तर कुठे कुटुंबांवर अचानक कोसळले दुःखाचे आभाळ

ऑगस्टचा काळा अध्याय; अमळनेर तालुक्यात २५ संसारांवर दुःखाचे सावट

अमळनेर (प्रतिनिधी) ऑगस्ट महिना अमळनेर तालुक्यातील अनेक कुटुंबांसाठी अक्षरशः काळ ठरला. महिनाभरात घडलेल्या विविध अपघात, पाण्यात बुडून मृत्यू, आत्महत्या तसेच अचानक झालेल्या मृत्यूच्या घटनांनी अनेक घरांतील आनंद हिरावून घेतला. काही कुटुंबांनी आपल्या कर्त्या व्यक्ती गमावल्या, काहींच्या डोळ्यांसमोर लेकरांचे आयुष्य संपले, तर काही घटनांमध्ये एकाच कुटुंबातील अनेक सदस्यांचा दुर्दैवी अंत झाला.

ऑगस्टच्या अखेरीस गलवाडे येथून धार्मिक कार्यक्रम आटोपून परतणाऱ्या रंजाणे येथील दोन मित्रांचा अपघाती मृत्यू झाला आणि या काळ्या घटनांच्या मालिकेवर आणखी एक दुःखद अध्याय जोडला गेला.

गलवाडेहून परतताना दोन मित्रांचा दुर्दैवी अंत

३० ऑगस्ट रोजी गलवाडे येथील धार्मिक कार्यक्रम आटोपून स्कुटीवरून रंजाणेकडे परतणारे पंडित धाकू भिल (५०) आणि नागो अमृत सपकाळे (४५) यांचा भीषण अपघातात मृत्यू झाला. पेट्रोल पंपाजवळ स्कुटी रस्त्याच्या कडेला उभ्या असलेल्या डंपरवर आदळली. धडक एवढी जोरदार होती की दोघांचाही घटनास्थळी मृत्यू झाला. काही वेळापूर्वी भंडाऱ्याचा प्रसाद घेऊन आनंदाने निघालेले दोघे घरी पोहोचण्यापूर्वीच काळाच्या पडद्याआड गेले.

टाकरखेड्यात एका कुटुंबातील चौघांचा अंत; प्रकरणाला नवे वळण

२७ ऑगस्ट रोजी टाकरखेडा येथे सुनील अमृत भिल, त्यांची पत्नी पार्वती आणि दोन मुलांचा रेल्वेखाली मृत्यू झाल्याची हृदयद्रावक घटना घडली. एकाच कुटुंबातील चार जणांचा मृत्यू झाल्याने संपूर्ण गाव हादरले. त्यानंतर मानसिक त्रास व धमक्यांच्या आरोपावरून सीताराम उर्फ गटलु ताणकु भिल याच्याविरुद्ध आत्महत्येस प्रवृत्त केल्याचा गुन्हा दाखल करून त्याला अटक करण्यात आली. या प्रकरणाचा तपास सुरू आहे.

खौशी येथे मुलाला वाचवताना बापाचाही मृत्यू

याच काळात खौशी येथे तलावात बुडत असलेल्या मुलाला वाचविण्यासाठी पाण्यात उतरलेल्या वडिलांचाही दुर्दैवी मृत्यू झाला. मुलाला वाचविण्याच्या प्रयत्नात दोघेही पाण्यातील गाळात अडकले. बाप-लेकाचा एकाच दुर्घटनेत मृत्यू झाल्याने खौशी गावावर शोककळा पसरली.

बोरी नदीपात्रात १२ वर्षीय दक्षचा बुडून मृत्यू

कन्हेरे येथील बोरी नदीपात्रात पोहण्यासाठी गेलेल्या १२ वर्षीय दक्ष राजेंद्र नेरकर याचा पाण्यात बुडून मृत्यू झाला. पाण्याच्या खोलीचा अंदाज न आल्याने ही दुर्घटना घडली. स्थानिकांनी शोध घेऊन त्याला बाहेर काढले; मात्र डॉक्टरांनी त्याला मृत घोषित केले. एका चिमुकल्याच्या मृत्यूने नेरकर कुटुंबावर दुःखाचा डोंगर कोसळला.

निसर्डी धरणात मासेमारीसाठी गेलेल्या इसमाचा अंत

४ ऑगस्ट रोजी खडके येथील नामदेव दामू भिल (५५) हे मासेमारीसाठी निसर्डी धरणावर गेले होते. मात्र ते घरी परतले नाहीत. दुसऱ्या दिवशी शोध घेतला असता त्यांचा मृतदेह धरणाच्या पाण्यात आढळला. मासेमारीच्या जाळ्यात अडकल्याने बुडाल्याचा प्राथमिक अंदाज व्यक्त करण्यात आला.

तापी नदीनेही घेतला युवकाचा बळी

सावखेडा परिसरातील तापी नदीत यावल तालुक्यातील किनगाव येथील निलेश मधुकर धनगर (२९) यांचा बुडून मृत्यू झाला. या घटनेने त्यांच्या कुटुंबीयांवर दुःखाचा डोंगर कोसळला.

दहिवदच्या विहिरीत बेपत्ता व्यक्तीचा मृतदेह

दहिवद येथील बबन भिमराव पाटील (६०) हे चार-पाच दिवसांपासून बेपत्ता होते. अखेर त्यांचा मृतदेह ग्रामपंचायतीच्या विहिरीत आढळून आला. या घटनेने परिसरात खळबळ उडाली.

छोटा हत्ती पलटी; २२ वर्षीय गोलूचा उपचारादरम्यान मृत्यू

सारबेटे गावाजवळ ‘छोटा हत्ती’ वाहनाचा टायर फुटल्याने वाहन पलटी झाले. या अपघातात गंभीर जखमी झालेल्या गोलू पठाण (२२) यांचा धुळे येथे उपचार सुरू असताना मृत्यू झाला. तरुणाच्या अकाली मृत्यूने कुटुंबीयांवर दुःखाचे आभाळ कोसळले.

फरशी पुलावरील अपघातात महिलेचा मृत्यू; सहा जखमी

२ ऑगस्ट रोजी ढेकू-आटाळे रस्त्यावर फरशी पुलावर पॅजो रिक्षा पलटी झाल्याने जिजाबाई रोहिदास पाटील (५५) यांचा उपचारादरम्यान मृत्यू झाला. या अपघातात सहा महिला जखमी झाल्या. मजुरी करून घरी परतणाऱ्या महिलांच्या प्रवासावर काळाने घाला घातला.

पिंपळे रोडवरील नाल्यात पोलीस कर्मचाऱ्याचा दुर्दैवी अंत

९ ऑगस्ट रोजी पिंपळे रोडवरील नाल्यात मोटरसायकल घसरून पडल्याने मारवड पोलीस ठाण्यात कार्यरत पोलीस हवालदार भरत एकनाथ गायकवाड (४४) यांचा मृत्यू झाला. कर्तव्य बजावणाऱ्या पोलीस कर्मचाऱ्याच्या अशा अपघाती मृत्यूने पोलीस दलातही हळहळ व्यक्त झाली.

दहिवद आणि अमळनेर शहरात आत्महत्येच्या दोन घटना

ऑगस्टच्या सुरुवातीलाच दहिवद आणि अमळनेर शहरातील वाडी चौक परिसरात दोन वेगवेगळ्या घटनांमध्ये दोघांचा मृत्यू झाला. राहुल दत्तात्रय सोनार (२९) आणि दीपक विठ्ठल गुरव (५२) यांच्या मृत्यूची पोलिसांत अकस्मात मृत्यू म्हणून नोंद करण्यात आली. दोन्ही घटनांमागील नेमके कारण स्पष्ट झालेले नव्हते.

गोहिल नगरात गाईच्या गोठ्यात मृत्यू

गोहिल नगर परिसरात अभिमन सोनू शेटे यांचा मृत्यू झाला. ही घटना गाईच्या गोठ्यात घडली. या प्रकरणाची पोलिसांनी अकस्मात मृत्यू म्हणून नोंद केली असून, घटनेमागील कारणाचा तपास करण्यात आला.

जानवे येथील विवाहित महिलेचा उपचारादरम्यान मृत्यू

तालुक्यातील जानवे येथील २८ वर्षीय मनिषा समाधान पाटील यांनी विषारी द्रव्य प्राशन केल्यानंतर उपचार सुरू असताना २४ ऑगस्ट रोजी प्राण गमावले. या घटनेची अमळनेर पोलिसांत अकस्मात मृत्यू म्हणून नोंद करण्यात आली असून, मृत्यूमागील कारण स्पष्ट झालेले नाही.

चक्कर आली अन् सायकलस्वाराचा जीव गेला

पैलाड येथील शिवाजी उत्तम पाटील (४६) हे सायकलवरून शेताकडे जात असताना अचानक चक्कर आल्याने खाली पडले. गंभीर दुखापतीमुळे त्यांचा मृत्यू झाला. रोजच्या कामासाठी घराबाहेर पडलेल्या व्यक्तीचा अचानक मृत्यू झाल्याने कुटुंबीयांना मोठा धक्का बसला.

आजारपणानेही दोन कुटुंबांवर कोसळले दुःख

मंगरूळ येथील हेमंत विश्वास पाटील (४४) आणि फरशी रोड परिसरातील समाधान बच्छाव (३९) यांचा ऑगस्टमध्ये आजारपणामुळे मृत्यू झाला. अचानक आलेल्या मृत्यूमुळे दोन्ही कुटुंबांवर दुःखाचा डोंगर कोसळला.

ऑगस्टने दिल्या असंख्य वेदनादायी आठवणी

ऑगस्ट महिन्यातील या घटना केवळ आकडेवारी नाहीत; त्या प्रत्येकामागे एक कुटुंब, अनेक स्वप्ने आणि असंख्य आठवणी आहेत. कुणाचा मुलगा गेला, कुणाचा वडील, कुणाची आई, कुणाचा जीवनसाथी तर कुणाचे संपूर्ण कुटुंबच काळाच्या पडद्याआड गेले.

जून-जुलैपासून सुरू असलेल्या दुर्दैवी घटनांच्या मालिकेने ऑगस्टमध्ये आणखी गंभीर रूप घेतले. रस्ते अपघात, पाण्यातील दुर्घटना आणि अचानक मृत्यूंच्या घटनांनी अमळनेर तालुक्यात सुरक्षिततेचा प्रश्न पुन्हा ऐरणीवर आणला आहे.

काही घटना नियतीच्या होत्या, तर काही दुर्घटनांमध्ये रस्त्यांची अवस्था, वाहतुकीची सुरक्षितता, पाणवठ्यांवरील धोके आणि नागरिकांची सुरक्षितता याबाबत गंभीर प्रश्न निर्माण होतात. या घटनांमधून प्रशासन आणि नागरिकांनीही धडा घेण्याची गरज आहे.

ऑगस्ट संपला ; मात्र या महिन्याने अमळनेर तालुक्यातील अनेक घरांना दिलेल्या जखमा मात्र सहज भरून निघणाऱ्या नाहीत.

ऑगस्टच्या अखेरीस तीन दिवसांत आणखी तीन मृत्यू

ऑगस्ट महिना संपत असतानाच अमळनेर तालुक्यातील दुर्दैवी घटनांची मालिका थांबण्याचे नाव घेत नाही. शेवटच्या तीन दिवसांत आत्महत्येच्या दोन आणि विष प्राशनाच्या एका घटनेत आणखी तीन जणांचा मृत्यू झाला.

धार येथे ७६ वर्षीय वृद्धाची आत्महत्या

धार येथील पंडित राघो पाटील (७६) यांनी ३० ऑगस्ट रोजी दुपारी साडेबारा वाजता राहत्या घरी झोक्याच्या दोरीने गळफास घेऊन आत्महत्या केली. सुखदेव पंडित पाटील यांनी मारवड पोलीस ठाण्यात खबर दिल्यानंतर अकस्मात मृत्यूची नोंद करण्यात आली आहे. या घटनेचा तपास हेडकॉन्स्टेबल शरीफ पठाण करीत आहेत.

खर्दे येथे ३० वर्षीय तरुणाचा गळफास

शिंदखेडा तालुक्यातील नरडाणा येथील मूळ रहिवासी आणि सध्या अमळनेर तालुक्यातील खर्दे येथे राहणाऱ्या सतीलाल राजधर भिल (३०) यांनी २९ ऑगस्ट रोजी सकाळी पावणेआठच्या सुमारास फुलसिंग पोपट भिल यांच्या बंद घरातील लोखंडी ग्रीलला साडी बांधून गळफास घेतला. याप्रकरणी मारवड पोलीस ठाण्यात अकस्मात मृत्यूची नोंद करण्यात आली असून, तपास हेडकॉन्स्टेबल सुनील पाटील करीत आहेत.

एकतास येथे विष प्राशन केलेल्या तरुणाचा मृत्यू

तालुक्यातील एकतास येथील अंकित विश्राम पाटील यांनी २८ ऑगस्ट रोजी विषारी द्रव्य प्राशन केले होते. त्यांना तातडीने उपचारासाठी नर्मदा फाउंडेशन येथे दाखल करण्यात आले. प्रकृती अधिक खालावल्याने २९ ऑगस्ट रोजी त्यांना ग्रामीण रुग्णालयात आणण्यात आले; मात्र उपचारादरम्यान त्यांचा मृत्यू झाला. याप्रकरणी मारवड पोलिसांत अकस्मात मृत्यूची नोंद करण्यात आली असून तपास हेडकॉन्स्टेबल सुनील पाटील करीत आहेत.

ऑगस्टच्या काळ्या यादीत आणखी तीन नावे

या तीन घटनांमुळे ऑगस्ट महिन्याच्या अखेरीस अमळनेर तालुक्यातील मृत्यूंच्या मालिकेत आणखी तीन दुःखद घटना जोडल्या गेल्या. अपघात, पाण्यात बुडणे, आत्महत्या, आजारपण आणि अचानक मृत्यू अशा विविध कारणांनी महिनाभरात अनेक कुटुंबांवर दुःखाचा डोंगर कोसळला आहे.

विशेष म्हणजे, महिन्याच्या अखेरीस अवघ्या तीन दिवसांत दोन गळफासाच्या आणि एका विष प्राशनाच्या घटनेने आत्महत्येचा गंभीर प्रश्न पुन्हा ऐरणीवर आला आहे. या घटनांमागील नेमकी कारणे संबंधित पोलिस तपासातून स्पष्ट होणार आहेत.

ऑगस्ट संपत असला तरी या महिन्याने अमळनेर तालुक्यातील अनेक कुटुंबांच्या आयुष्यात निर्माण केलेली पोकळी आणि वेदनादायी आठवणी मात्र कायम राहणार आहेत.